SALAMU ZA BAKWATA KWENYE MAHAFALI YA SHULE YA MSINGI IBUN JAZARY

Mwenyekiti wa Halmashauri Kuu Baraza la Waislamu Nchini BAKWATA Hamis Mataka amewataka wazazi kuwachunga watoto na kuhakikisha wanakuwa na maadili mema kwani ulimwengu umebadilika wanaweza wakapandikizwa vitu vitakavyo kuwa na athari hapo baadae, hivyo wakichungwa na kupatiwa elimu bora yenye utambuzi wataishinda vita hiyo.

Mwenyekiti huyo akimuwakilisha Muft wa Tanzania Abubakar Zubeir ameyasema hayo Jijini Dar es Salaam katika mahafali ya 5 ya shule ya Msingi IBUN JAZARY iliyopo wilaya ya Mkuranga Mkoani Pwani na kusisitiza kuwa kwa mujibu ya Dini ya Kiislamu maadili na tabia njema humjenga muislam jambo ambalo shule hiyo inalifanya na kuwapelekea wanafunzi kuishi kwa kumuogopa Mungu.

Pia ameipongeza shule hiyo kwa kuweza kutoa Elimu ya Dini na Dunia pamoja jambo ambalo shule zingine hazifanyi na kufafanua kuwa kufanya hivyo ni kumpa mwanafunzi akili ya yale anayojifunza na moyo wa kumuogopa Mwenyezi Mungu kwa kufanya yaliyo mema.

Kwa upande wake Mkurugenzi wa shule hiyo Othman Ally Kaporo amewashukuru wadau wote waliochangia mafanikio ya shule kwa kuwa shule bora kwa Mkoa wa Pwani kwa kutoa kumi bora ya wanafunzi kimkoa jambo ambalo limempelekea kutowatoza ada tano bora ya wanafunzi hao watakao endelea na shule ya Sekondari inayomilikiwa na taasisi hiyo ya Ibun Jazary.