WAZIRI ZANZIBAR ANENA HAYA KUHUSU WAFANYAKAZI KAMATI YA MAAFA

Wafanyakazi wa Kamati ya Maafa Zanzibar na ile ya sherehe na mapambo,wametakiwa kufanya kazi kwa kuzingatia maadili ili kuhakikisha malengo yaliyowekwa yanafikiwa.

Akizungumza na wafanyakazi hao katika ofisi ya kamati hiyo Forodhani
mjini Zanzibar, Naibu Waziri katika Ofisi ya Makamu wa Pili wa Rais Mihayo Juma Nhunga amewataka kuvumilia mazingra magumu yanayowakabili katika utendaji wao.

Nhunga amesema, kwa kuwa dunia inakabiliwa na changamoto ya ukosefu wa ajira, hivyo waliopata nafasi hiyo waiheshimu kwa kuwajibika ipasavyo
na kwa mujibu wa kanuni na miongozo ya kazi sambamba na  kuwasisitiza
watendaji hao kuepuka kujenga matabaka sehemu za kazi, akisema kufanya hivyo kunarejesha nyuma harakati za kuleta maendeleo.

Mapema, Mkurugenzi Mtendaji wa Kamati ya Maafa Ali Juma Hamad, amesema wanakabiliwa na changamoto ya uelewa mdogo walionao wananchi kuhusiana na maafa sanjari na  ukosefu wa elimu, wananchi hushindwa kufuata taratibu zinazopaswa wakati kunapotokea maafa nchini au katika baadhi ya maeneo.

Wafanyakazi wa idara hizo wamelalamikia uhaba wa vitendea kazi ikiwemo
usafiri na kompyuta, ambapo wamesema hali hiyo inawapa usumbufu mkubwa sambamba na kuiomba  serikali, kuangalia kwa uzito mkubwa maslahi ya wafanyakazi ingawa imekuwa ikijitahidi kulitafutia ufumbuzi suala hilo.