TAARIFA YA JESHI LA POLISI MKOANI MWANZA

     

• SILAHA MOJA YAPATIKANA NA MAJAMBAZI WAWILI KUUAWA WAKATI WAKITAKA KUJARIBU KUTOROKA ASKARI POLISI WILAYANI ILEMELA.

• WALIMU WATATU WANASHIKILIWA NA JESHI LA POLISI KWA KOSA LA KUKIMBIA VITUO VYAO VYA KAZI HUKU WAKIENDELEA KULIPWA FEDHA NA SERIKALI WILAYANI NYAMAGANA.

• MLINZI WA KAMPUNI YA ULINZI AMEKUTWA AKIWA AMEFARIKI DUNIA KWA KUNYONGWA SHINGO WILAYANI NYAMAGANA.

KWAMBA TAREHE 20.01.2016 MAJIRA YA SAA 20:30HRS USIKU, KATIKA MTAA WA KILOLELI “A” KATA YA NYASAKA MKOA WA MWANZA, ILIPATIKANA SILAHA MOJA AINA YA SHORT GUN YENYE NAMBA TZ CAR 103283 IKIWA NA RISASI TATU AMBAYO INADAIWA WALIPORA KWENYE KAMPUNI YA ULINZI IITWAYO MALIKA SECURITY SERVICE LIMITED  NA MAJAMBAZI WAWILI WALIOJULIKANA KWA MAJINA YA 1. ERIC MAGESE MIAKA 22, NA 2. ALIYEJULIKANA KWA JINA MOJA LA PETER MIAKA KATI 25 HADI 27 WOTE WAKAZI WA MECCO, AMBAO WALIUAWA WAKATI WAKIJARIBU KUTOROKA ASKARI POLISI PINDI WAKIWAPELEKA MAHALI AMBAPO WENZAO WAMEJIFICHA ILI WAWEZE KUFANYA UVAMIZI.

MAJAMBAZI HAO WALIKUWA WAKITAFUTWA NA POLISI BAADA YA KUFANYA UNYANG’ANYI WA KUTUMIA SILAHA KATIKA MAENEO YA KITANGIRI MNAMO TAREHE 19.12.2016 MAJIRA YA 22:00HRS WALIPOVAMIA SUPER MARKET IITWAYO STOP NA PAX AMBAPO WALIMJERUHI KWA RISASI MLINZI  LAKINI HAWAKUFANIKIWA KUPORA KITU CHOCHOTE, AIDHA MAJAMBAZI HAO PIA WALIFANYA UNYANG’ANYI WA KUTUMIA SILAHA MNAMO TAREHE 02.01.2016 MAJIRA YA SAA 22:50HRS KATIKA MTAA WA NYASAKA AMBAPO WALIVAMIA DUKA LA BIDHAA MBALIMBALI  MALI YA GASPER JOHAS MIAKA 40 KISHA WAKAPIGA RISASI MOJA HEWANI NA KUPORA FEDHA KIASI CHA TSH 4,020,000/=

AIDHA WAKATI ASKARI WAKIENDELEA KUWATAFUTA MAJAMBAZI HAO ZILIPATIKANA TAARIFA KUTOKA KWA RAIA WEMA KWAMBA WAMEONEKANA HAPA MJINI MWANZA, NDIPO ASKARI WALIWEKA MTEGO NA KUFANIKIWA KUMKAMTA KWANZA ERIC MAGESA NA ALIPOHOJIWA ALIKIRI KUHUSIKA KATIKA MATUKIO TAJWA HAPO JUU KISHA ALIWAPELEKA ASKARI NYUMBANI KWAKE AMBAPO KULIPATIKANA SILAHA MOJA AINA YA SHORT GUN YENYE NAMBA TZ CAR 103283 NA KUELEZA KUWA ALIKUWA AKISHIRIKIANA NA MWENZAKE PETER AMBAYE NAYE ALIKAMATWA.

ASKARI WALIENDELEA KUWAHOJI AMBAPO WALIELEZA KUWA WALIPANGA KUVAMIA MADUKA MENGINE HAPA JIJINI MWANZA MAENEO YA KIRUMBA WAKISHIRIKIANA NA WENZAO WAWILI AMBAO MAJINA TUNAYAHIFADHI NDIPO WALIKUBALI KUWAPELEKA ASKARI HADI ENEO AMBALO WALIPANGA KUKUTANA ILI WAKAFANYE UVAMIZI,  AIDHA MAJAMBAZI HAO WALIPOFIKA NA ASKARI KATIKA ENEO HILO WALIANZA KUPIGA KELELE KAMA ISHARA YA KUWATOROSHA WENZAO NA KUANZA KUWAKIMBIA ASKARI, ASKARI WALIFYATUA RISASI KADHAA HEWANI WAKIWAAMURU WASIMAME LAKINI WALIGOMA NDIPO WALIWAFYATULIA RISASI ZA MGUUNI KWA BAHATI MBAYA ZILIWALENGA MAENEO YA JUU AMBAPO WALIFARIKI DUNIA WAKATI WAKIPELEKWA HOSPITALI, MIILI YA MAREHEMU IMEHIFADHIWA KATIKA HOSPITALI YA RUFAA YA BUGANDO KWA AJILI YA UCHUNGUZI, UPELELEZI NA MSAKO BADO UNAENDELEA WA KUWASAKA MAJAMBAZI WENGINE AMBAO BADO HAWAJAPATIKANA.

KAMANDA WA POLISI MKOA WA MWANZA NAIBU KAMISHINA WA POLISI AHMED MSANGI ANATOA WITO KWA WAKAZI WA JIJI NA MKOA WA MWANZA AKIWATAKATA WAWAELIMISHE VIJANA WAO WAACHE TABIA YA KUJIHUSISHA NA UHALIFU WA KUTUMIA SILAHA KWANI NI KOSA LA JINAI, HIVYO YATAWAKUTA MAMBO KAMA HAYA YANAYOWAKUTA WENZAO.

KATIKA TUKIO LA PILI

KWAMBA TAREHE 23.01.2017 MAJIRA YA ASUBUHI KATIKA MTAA WA BUHONGWA WILAYA YA NYAMAGANA JIJI NA MKOA WA MWANZA, WALIKAMATWA WALIMU WATATU WALIOJULIKANA KWA MAJINA YA 1. RCHARD MGENDI MIAKA 30, MJITA MWALIMU WA SHULE YA SEKONDARI YA MISASI, 2. RWIZA NTARE MIAKA 27, MSUBI MWALIMU WA SHULE YA SEKONDARI YA KIGONGO, NA 3. GILBERT MAKWAYA MIAKA 33, MUHA MWALIMU SHULE YA SEKONDARI RUNIMA, WANASHIKILIWA NA JESHI LA POLISI KWA KOSA LA  KUKIMBIA VITUO VYAO VYA KAZI NA KUFANYA KAZI SHULE BINAFSI NA KUENDELEA KUPOKEA MISHAHARA YA SERIKALI HUKU WAKIDANGANYA SERIKALI KWAMBA WAPO MASOMONI KWA MUDA MREFU KITENDO AMBACHO NI KOSA KISHERIA.

INADAIWA MWALIMU RICHARD MUGENDI ALIKUWA AKIFUNDISHA SHELE YA SEKONDARI YA MISASI WILAYANI MISUNGWI, MWAKA 2012 ALIMUAGA MKURUGENZI WA WILAYA HIYO KUWA ANAKWENDA KUSOMA MASTERSTERS YA LUGHA (LINGUISTIC) KATIKA CHUO KIKUU CHA MTAKATIFU AUGUSTINO, KWA KIPINDI CHOTE HICHO INADAIWA MWALIMU HUYO ALIKWENDA KUSOMA NA ALIPOMALIZA HAKURUDI KATIKA SHULE YAKE YA AWALI BALI ALIKUWA AKIFUNDISHA SHULE BINAFSI YA SEKONDARI IITWAYO MUSABE ILIPO BUHONGWA HUKU AKIENDELEA KULIPWA MSHAHARA KUTOKA SERIKALINI.

MWALIMU RWIZA NTARE ALIKUWA AKIFUNDISHA SHULE YA SEKONDARI IITWAYO KIGONGO SEKONDARI ILIYOPO WILAYA YA CHATO MKOANI GEITA AMBAPO MWAKA 2015, ALIMUAGA MKURUGENZI WAKE KUWA ANAKWENDA HOSPITALI YA RUFAA YA BUGANDO KUPATIWA MATIBABU YA MACHO NA VIDONDA VYA TUMBO LAKINI HAKURUDI TENA BALI INADAIWA ALIKUA AKIFUNDISHA SHULE BINAFSI YA SEKONDARI IITWAYO MUSABE ILIYOPO MTAA WA BUHONGWA HUKU AKIENDELEA KULIPWA MSHAHARA NA SERIKALI.

AIDHA MWALIMU GILBERT MAKWAYA ALIKUWA AKIFUNDISHA RUNIMA SEKONDARI ILIYOPO MAENEO YA BUHONGWA NA ALIMUAGA MKURUGENZI WA WILAYA YA NYAMAGANA TAREHE 27/09/2015 KUWA ANAKWENDA KUSOMA MASTERS YA HESABU KATIKA CHUO KIKUU CHA MWENGE KILICHPO MJINI MOSHI LAKINI HAKWENDA BALI ALIKUWA AKIFUNDISHA SHULE BINAFSI YA MUSABE ILIYOPO MTAA WA BUHONGWA HUKU AKIENDELEA KUPOKEA MSHAHARA KUTOKA SERIKALINI.

WALIMU WOTE WATATU WAPO KATIKA MAHOJIANO NA JESHI LA POLISI PINDI UCHUNGUZI UKIKAMILIKA WATAFIKISHWA MAHAKAMANI, JESHI LA POLISI LINAENDELEA KUWATAFUTA BAADHI YA WALIMU AMBAO WAMETOROKA LAKINI INADAIWA WAPO KATIKA SHULE HIYO BINAFSI YA MUSABE HUKU WAKIENDELEA KULIPWA MSHAHARA NA SERIKALI PAMOJA NA MKURUGENZI WA SHULE HIYO.

KAMANDA WA POLISI MKOA WA MWANZA NAIBU WA KAMISHINA WA POLISI AHMED MSANGI ANATOA WITO KWA WATUMISHI WA SERIKALI AKIWATAKA KUFANYA KAZI KWA KUZINGATIA SHERIA NA TARATIBU ZA KAZI BILA KUFANYA UDANGANYIFU WA AINA YEYOTE ILE, AIDHA ENDAPO IKABAINIKA KUNA UDANGANYIFU UNAFANYIKA MAHALI HATUA STAHIKI ZA KISHERIA ZITACHUKULIWA DHIDI YA MTUHUMIWA.

KATIKA TUKIO LA TATU.

MNAMO TAREHE 23.01.2017 ,MAJIRA YA SAA 6:40HRS ASUBUHI KATIKA OFISI YA TANESCO MKOLANI  KATA YA MKOLANI WILAYA YA NYAMAGANA JIJI NA MKOA WA MWANZA, MTU MMOJA ALIYEJULIKANA KWA JINA LA ISSAYA WILSONI JEREMIAH MIAKA 30, MLINZI WA KAMPUNI IITWAYO SUPREME  SECURITY GUARD NA MKAZI WA BUGARIKA , ALIKUTWA AKIWA AMEFARIKI DUNIA KWA KUNYONGWA SHINGO  NA MTU/WATU AMBAO BADO HAWAJAJULIKANA. NA KUIBIWA BAADHI  VITU AMBAVYO WALIKUWA WAKIVILINDA KATIKA LINDO HILO AMBAVYO NI TELEVISHENI INCHI 32 FLAT SCREENE AINA ZEC, COMPUTER NNE AINA YA DELL, SCANA MOJA AINA YA DELL, NA KING’AMUZI CHA STAR TIMES.

INADAIWA KUWA MAREHEMU ALIINGIA KAZINI LINDONI MNAMO TAREHE 22.01.2017 MAJIRA YA SAA 18:00HRS JIONI  KATIKA OFISI YA TANESCO MKOLANI  AKIWA  NA SILAHA AINA YA MARK IV AKIWA NA MWANZEKE AITWAYE YOSAM GABRIEL MIAKA 23, AMBAYE ALIKUWA NA KIRUNGU, NDIPO LEO MAJIRA TAJWA HAPO JUU ALIKUTWA AKIWA AMEFARIKI DUNIA HUKU MWENZAKE ALIYEKUWA NAE AKIWA AMETOROKA.

UPELELEZI KUHUSIANA NA TUKIO HILO BADO UNAENDELEA PAMOJA NA  MSAKO WA KUMSAKA MLINZI AMBAYE AMETOROKA, MWILI WA MAREHEMU UMEHIFADHIWA HOSPITALI YA RUFAA YA BUGANDO KWA AJILI YA UCHUNGUZI, PINDI UCHUNGUZI UKIKAMILIKA UTAKABIDHIWA KWA NDUGU WA MAREHEMU KWA AJILI YA MAZISHI.

KAMANDA WA POLISI MKOA WA MWANZA ANATOA WITO KWA WAKAZI WA JIJI NA MKOA WA MWANZA AKIWATAKA KUTOA USHIRIKIANO KWA JESHI LA POLISI ILI WATU WALIOHUSIKA KATIKA MAUAJI HAYO WAWEZE KUKAMATWA NA KUFIKISHWA KWENYE VYOMBO VYA SHERIA.

IMETOLEWA NA:

DCP: AHMED MSANGI

KAMANDA WA POLISI (M) MWANZA