Habari Picha: Zaidi ya watu 200 wamefariki kwa tetemeko la ardhi Mexico

Tetemeko baya la ardhi lenye nguvu ya kipimo cha saba nukta moja limedondosha karibu majengo 30 katikati mwa mji mkuu wa Mexico city na kusababisha vifo vya zaidi ya watu 200 ambapo maafisa wa serikali nchini humo wanasema idadi ya waliokufa inaweza kuongezeka.

Watu wanaotoa huduma za dharura wakisaidiwa na mamia ya watu wanaojitolea bado wanaendelea kutafuta manusura ambao wamefukiwa na kifusi.

Daniel Lieberson alikuwa katika hotel ya Hilton Mexico City wakati tukio hilo likitokea anasimulia haya“…Nilikuwa katika ghorofa ya 26. jengo lilikuwa likiyumba mbele na nyuma vioo vyote vilivunjika na tuliogopa kwamba madirisha yatavunjika, lakini haikuwa hivyo. Lakini mashine ya kutengenezea kahawa na vitu vingine vilianguka chini vyote, meza, ilikuwa shida kweli, lilidumu kwa sekunde thelathini tu, lakini ilionekana kama limedumu daima…” anasema Daniel Lieberson.

Kwa upande wake Natasha Pizzey mwandishi wa habari katika mji huo anasema kuna idadi kubwa ya watu waliofukiwa na kifusi baada ya majengo kuporomoka.

”..Tunafahamu kuna watu walionusurika katika majengo ya makazi yaliyoporomoka, hatukuwa na uwezo wa kuwaokoa. Kuna mamia ya wafanyakazi wa kujitolea waliokwenda katika eneo la tukio…” ameongezea kusema

Aidha pia kumetokea madhara mabaya katika majimbo ya jirani ya Morelos na Puebla.

Mapema mwezi huu tetemeko hilo la ardhi pia lilipita katika eneo la pani ya kusini magharibi mwa Mexico na kusababisha vifo vya watu 90.